Naima
At meydanında yedi seneden beri binâsına sarf-ı makdûr olunan câmi-i şerîfin kubbesi tamâm olup kilitlenicek, vakit gelmegle sene-i mezbûre cemâziye'l-âhiresinin dördüncü günü câmi-i mezbûr sahasında otaklar kurulup taht-ı pâdişâhî vaz' olundu. Cümle vüzerâ ve ulemâ ve erkân-ı devlet dâvet ve âli ziyâfet tertîb olunduktan sonra her biri serây-ı âmireye varıp, hil'atlanıp, pâdişâh önüne düşüp otağa getürdiler. Evvelâ sadrazam vüzerâ ile girip tehniyet, ba'dehû şeyhülislâm vesâir ulemâ ve meşâyih girip takbîl-i dâmen-i pâdişâhî itdiler. Bin kadar hil'at ve sof giydirildi. İki şehzâdeler mücevveze ile cânib-i yemînde ayag üzere dururlar idi.